Que é un pacto de mellora?
Son pactos de mellora aqueles polos que se convén a favor dos descendentes a sucesión en bens concretos.
Os pactos sucesorios deberán ser outorgados en escritura pública.
Os pactos sucesorios poderán supor a entrega ou non de presente dos bens aos que afecten, determinando no primeiro caso a adquisición da propiedade por parte da persoa mellorada.
No pacto sucesorio poderán contemplarse os supostos nos que este quedará sen efecto e determinarse o ámbito residual das facultades dispositivas das persoas adxudicantes.
Os pactos de mellora quedan sen efecto:
- Se a persoa mellorada incumprise os deberes asumidos.
- Pola morte da persoa mellorada antes que a mellorante, agás pacto expreso de substitución polos seus herdeiros ou que a mellora se realizase con entrega de bens de presente.
- Por incorrer a persoa mellorada en causa de desherdamento pola súa conduta gravemente inxuriosa ou vexatoria (delito con sentenza firme).
Fiscalidade dos pactos de mellora
Polo outorgamento dun pacto de mellora é preciso liquidar os seguintes impostos:
- Incremento do valor dos terreos de natureza urbana (Plusvalía Municipal) para o caso de que se transmita un ben inmoble. O suxeito pasivo é o adquirente.
O importe determinarase aplicando unha porcentaxe á diferenza de valor entre o valor de adquisición pola persoa mellorante e o valor de adquisición pola persoa mellorada. A porcentaxe varía en función da Administración Municipal do lugar no que radique o inmoble.
- Imposto sobre Sucesións e Doazóns. O suxeito pasivo é o adquirente.
Deberá presentarse no prazo de seis meses desde a realización da escritura pública. Nas adquisicións por descendentes de 21 anos ou máis están exentas de tributación ata 1.000.000 de euros.
