Que é un seguro de vida asociado a un préstamo hipotecario con prima única?
Ao mesmo tempo que se contrata un préstamo hipotecario, en moitas ocasións impóñese a contratación dun seguro de vida como condición para obter o préstamo con garantía hipotecaria.
Este seguro adoita subscribirse cunha aseguradora pertencente ao mesmo grupo empresarial ca entidade bancaria coa que se concertou o préstamo.
Ademais, impóñese o pagamento do seguro mediante unha prima única que aumenta o importe total financiado e supón a súa devolución aprazada co conseguinte devindicación de xuros.
Por que é unha práctica abusiva?
A práctica e a contratación deste seguro poden resultar abusivas:
1. Non se trata dun seguro cuxas condicións ou entidade aseguradora puidese elixir a parte prestataria, senón dunha imposición en todos os sentidos, xa que mesmo a entidade aseguradora pertence ao mesmo grupo ca entidade bancaria coa que se concertou o préstamo. Deste xeito, o banco non só presta o diñeiro, senón que tamén figura como primeiro beneficiario do seguro de vida.
2. A simultaneidade do ingreso por parte do banco do importe da prima única do seguro imposto e do capital do préstamo, financiándoos conxuntamente.
Que establecen os tribunais?
Existen numerosos pronunciamentos xurisprudenciais que consideran que a contratación simultánea do seguro no momento da subscrición do préstamo reforza a vinculación entre ambas operacións e evidencia a falta de explicación e de alternativas para contratar. Tamén debe destacarse o manifestado pola Dirección Xeral de Seguros, no sentido de que «se considera inadecuada e contraria ás boas prácticas e usos no ámbito dos seguros privados a imposición por parte da entidade aseguradora dun seguro a prima única á persoa tomadora.»
A xurisprudencia vén tomando en consideración, para apreciar a imposición e o carácter abusivo deste tipo de contratación, circunstancias como as seguintes:
«A solicitude de adhesión ao contrato de seguro tramítase a través das oficinas da entidade prestamista, que recorre á mediación e á súa contratación a través de sociedades do seu mesmo grupo; que sexa a entidade financeira a que se designe tomadora e beneficiaria, reducindo as persoas prestatarias á condición pasiva de solicitantes/aseguradas; que se estableza a contratación dunha prima única anticipada e se reteña do principal do préstamo o importe para o seu pagamento, importe que nunca chega a estar á disposición das persoas prestatarias, garantindo así que á sinatura do contrato de préstamo a operación quede pechada».
