O Supremo ordena a un banco devolver 22 anos de cotas dun préstamo subrogado por non informar o cliente das condicións que tiña o construtor.
Unha parella de Granada poderá recuperar os miles de euros de xuros que aboaron durante os últimos 22 anos polo préstamo co que no 2003 financiaron a compra da súa vivenda, que no seu caso é o que subscribira a promotora inmobiliaria que construíu o seu chalé e a cuxas condicións se subrogaron.
A cláusula de xuros do préstamo non quedou validamente incorporada ao contrato, ao non se lles entregar aos compradores a documentación necesaria nin facilitarlles a información precontractual preceptiva.
O alto tribunal destaca que non se lles proporcionou aos clientes finais «unha copia do préstamo ao promotor», como xa esixía a lexislación vixente daquela —o notario tampouco o comprobou—, e que a escritura de subrogación «non recolle ningunha indicación sobre o tipo de xuro aplicable». Se o banco non acredita ter informado adecuadamente o cliente e o dato non consta na escritura, a cláusula de xuros desaparece do contrato, o que implica a devolución íntegra dos xuros cobrados desde o inicio do préstamo. O Supremo lembra que a obriga de informar corresponde ao banco, «non ao notario nin ao promotor». Se a entidade non acredita ter cumprido esta obriga, a cláusula considérase non incorporada.
A mensaxe é clara: a banca non pode beneficiarse da súa propia falta de transparencia. Se non informou, non pode cobrar xuros.
Polo tanto, a consecuencia é a devolución de todos os xuros aboados desde o inicio do préstamo hipotecario.
Comproba aquí se a túa hipoteca está afectada. info@artigo.es
